news

အကြမ်းဖက်သောင်းကျန်းသူများ၏ မီးရှို့သတ်ဖြတ်ခြင်းခံရသော မင်းတပ်မြို့နယ်၊ တွီဒိန်ကျေးရွာ၊ ထေရဝါဒဗုဒ္ဓသာသနာပြုကျောင်းတိုက်ဆရာတော် ဘဒ္ဒန္တ ပညာဇောတ ၏ ရုပ်အလောင်းအား ပြန်လည်တွေ့ရှိ

နေပြည်တော်၊ ဇွန် - ၁၃

ချင်းပြည်နယ်၊ မင်းတပ်မြို့နယ်၊ တွီဒိန်ကျေးရွာရှိ ထေရဝါဒဗုဒ္ဓသာသနာပြု ကျောင်းတိုက်မှ ကျောင်းထိုင်ဆရာတော် ဘဒ္ဒန္တ ပညာဇောတ သည် ဇွန် ၇ ရက်နေ့တွင် ဟားခါးမြို့၌ ကျင်းပပြုလုပ်မည့် အစိုးရပထမပြန်စာမေးပွဲဖြေဆိုရန်အတွက် ဇွန် ၄ ရက် နေ့တွင် ကျောင်းပိုင် Nissan Note မော်တော်ယာဉ်ဖြင့် တစ်ပါးတည်းထွက်ခွာခဲ့ပြီး ပျောက်ဆုံးလျက်ရှိကြောင်းနှင့် မြေပြင်သတင်းအား ဆက်လက်ဖော်ထုတ်လျက်ရှိ ကြောင်း ဇွန် ၆ ရက်နေ့တွင် သတင်းထုတ်ပြန်ပြီးဖြစ်သည်။

ချင်းပြည်နယ်၊ ပညာရေးဦးစီးဌာနအတွက် ပေးပို့သော ကျောင်းသုံးပုံနှိပ်စာအုပ်များအား လက်နက်ကိုင်သောင်းကျန်းသူအဖွဲ့မှ မီးရှို့ဖျက်ဆီး

နေပြည်တော်၊ ဇွန် ၁၃

            ၂၀၂၁ ခုနှစ်၊ ဇွန်လ (ပထမပတ်)အတွင်းတွင် အထက်မြန်မာပြည် အစိုးရပုံနှိပ်စက်ရုံ (မန္တလေး) မှ ဟားခါးခရိုင်ပညာရေးဦးစီးဌာနအတွက် (KG)တန်းမှ (Grade-4)တန်းအထိ ကျောင်းသုံးပုံနှိပ်စာအုပ် ၁၂၇၇၉၇ (တစ်သိန်းနှစ်သောင်းခုနှစ်ထောင်ခုနှစ်ရာကိုးဆယ့်ခုနှစ်) အုပ် တင်ဆောင်လာသော ကုန်တင် ယာဉ်  ၂ စီးအား ရွာဗန်းကျေးရွာအနီး ဂန့်ဂေါ-ဟားခါး သွားကားလမ်း မိုင်တိုင် ၃၅ နှင့် ၄၀ အကြားတွင် လက်နက်ကိုင်အကြမ်းဖက်သောင်းကျန်းသူအင်အားစုများမှ တားဆီးထိန်းသိမ်းခဲ့ပြီး ယာဉ်ပေါ် တင်ဆောင်လာသော ကျောင်းသုံးပုံနှိပ်စာအုပ်များအား ယာဉ်ပေါ်မှချထားခိုင်းကာ ယာဉ်များအား နောက်ကြောင်းသို့ ထွက်ခွာစေခဲ့ကြောင်း သိရသည်။

            အဆိုပါနေရာသို့ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ယာဉ်ပေါ်မှ ပုံနှိပ်စာအုပ် ထုပ်များ ချထားခဲ့သည့်နေရာတွင် မီးရှို့ဖျက်ဆီးထားသည့် အခြေအနေကို တွေ့ရှိခဲ့ရသည်။

            ချင်းပြည်နယ်အတွင်းရှိ ကလေးငယ်များအတွက် ကျောင်းဖွင့်ရာသီအတွင်း ပညာတတ်မြောက် စေရေးအတွက် နိုင်ငံတော်အစိုးရမှ စီမံမှုဆောင်ရွက်ပေးနေစဉ် အစွန်းရောက်လက်နက်ကိုင် အဖွဲ့အစည်းများ၏ အသိဉာဏ်မဲ့ ရက်စက်ယုတ်မာစွာဆောင်ရွက်ခဲ့မှုကြောင့် ချင်းပြည်နယ်အတွင်းရှိ ကလေးငယ်များအတွက်သာ နစ်နာမှုဖြစ်ပေါ်ခဲ့ရကြောင်းနှင့် ကမ္ဘာတစ်ဝှမ်းလုံးမှလည်း လက်ခံမှု မရှိသည့်အပြင် ဝါဒမှိုင်းအစွန်းရောက်လုပ်ရပ်များ ဆောင်ရွက်ခဲ့မှုအပေါ် ရွံရှာစက်ဆုပ်လျက်ရှိကြောင်း သိရှိရသည်။

ကျန်းမာရေးနှင့် အားကစားဝန်ကြီးဌာနမှ CDM ပြုလုပ်ပြီး အကြမ်းဖက်အဖွဲ့အစည်း ဖြစ်သည့် NUG အား ဆက်သွယ်ကူညီနေသော ဒေါက်တာ ထားထားလင်း၊ ဒေါက်တာ မောင်မောင်ငြိမ်းထွန်းနှင့် ဒေါက်တာ ဆွေဇင်ဦး တို့အား ဖမ်းဆီး အရေးယူဆောင်ရွက်နေသည့် သတင်းထုတ်ပြန်ချက်

နေပြည်တော်၊ ဇွန်- ၁၃

                ကျန်းမာရေးနှင့် အားကစားဝန်ကြီးဌာန၊ တိုးချဲ့ကာကွယ်ဆေးထိုးလုပ်ငန်း ညွှန်ကြားရေးမှူး ဒေါက်တာ ထားထားလင်းသည် ၂၀၂၁ ခုနှစ်၊ ဖေဖော်ဝါရီလ ၁၁ ရက်မှ စ၍ ကျန်းမာရေးဝန်ကြီးဌာနနှင့် အဆက်အသွယ်ဖြတ်ကာ တိုးချဲ့ကာကွယ်ဆေးထိုး လုပ်ငန်း လက်ကျန်ငွေ ကျပ် ၁၆၁.၁၉၈ သန်းအား ငွေစာရင်း ရှင်းလင်းခြင်းမရှိဘဲ CDM ဝန်ထမ်းအဖြစ် ခံယူသွားခဲ့သူဖြစ်ပါသည်။ ထို့ကြောင့် ဒေါက်တာ ထားထားလင်း အား ၂၀၂၁ ခုနှစ်၊ ဖေဖော်ဝါရီလ ၂၀ ရက်တွင် ဥတ္တရသီရိမြို့နယ်၊ ဘုရားကုန်းမြို့မ ရဲစခန်းမှ (ပ)၁၁/၂၀၂၁ ၊ ရာဇသတ်ကြီးဥပဒေပုဒ်မ ၅၀၅-က ဖြင့် အမှုဖွင့်လှစ်ခဲ့ပြီးနောက် ဆက်လက်ရှာဖွေစုံစမ်းခဲ့ရာ ၂၀၂၁ ခုနှစ်၊ ဇွန်လ ၁၀ ရက်တွင် ဒဂုံမြို့နယ်၊ ယောမင်းကြီး ရပ်ကွက်၊ နဝဒေးလမ်းဘေးတွင် ဖမ်းဆီးရမိခဲ့ကြောင်း သိရှိရသည်။

                တရားခံ ဒေါက်တာ ထားထားလင်း၏ ထွက်ဆိုချက်အရ ၎င်းသည် CDM ဆရာဝန်အဖြစ်ခံယူလုပ်ဆောင်ခဲ့သည့်အပြင် ကျန်းမာရေးနှင့် အားကစားဝန်ကြီး ဌာနတွင် ၎င်းနှင့်အတူ တာဝန်ထမ်းဆောင်ခဲ့သော CDM ဆရာဝန်များနှင့်ဝန်ထမ်း များကို ဆက်သွယ်စည်းရုံး၍ CDM လှုပ်ရှားသူများ ပင်မအုပ်စု(CDMer Core Group)ကို ဖွဲ့စည်းပြီးနောက် မတရားအသင်းနှင့် အကြမ်းဖက်အဖွဲ့အစည်းအဖြစ် သတ်မှတ် ထားသည့် NUG နှင့်ပေါင်းစပ်လှုပ်ရှားခဲ့ကြောင်း သိရှိရသည်။

အမျိုးသားဒီမိုကရေစီအဖွဲ့ချုပ်(NLD)ပါတီမှ လက်နက်ခဲယမ်းဝယ်ယူမှု၊ ဖောက်ခွဲဖျက်ဆီးရေးဆောင်ရွက်မှုနှင့် စစ်သင်တန်းစေလွှတ်မှုတို့တွင် ညွှန်ကြားစေခိုင်းခဲ့သည့် သတင်းထုတ်ပြန်ချက်

နေပြည်တော်၊ ဇွန် - ၁၃

            အမျိုးသားဒီမိုကရေစီအဖွဲ့ချုပ်(NLD)ပါတီ၏ စေခိုင်းချက်အရ ဘီးလင်းမြို့နယ်ရှိ KNU တပ်မဟာ(၅)နယ်မြေတွင် စစ်သင်တန်းနှင့် ဖောက်ခွဲဖျက်ဆီးရေးသင်တန်း တက်ရောက်ခဲ့ပြီး လက်နက်ခဲယမ်းဝယ်ယူရေး ကိစ္စရပ်များအား ချိတ်ဆက်ဆောင်ရွက် ပေးခဲ့သည့် ငြိမ်းချမ်း(ခ)ခိုင်ကိုမွန်နှင့် ရွှန်းစိမ့်စိမ့်တို့အား မရမ်းကုန်းမြို့နယ်တွင် ၁၃-၅-၂၀၂၁ ရက်တွင် ဖမ်းဆီးရမိခဲ့သည်။ 

            ငြိမ်းချမ်းသည် မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF)မှ ထွန်းအောင်ကျော်၏ ချိတ်ဆက်ပေးမှုဖြင့် ၂၀၂၁ ခုနှစ်၊ မတ်လခန့်တွင် ရွှန်းစိမ့်စိမ့်နှင့်အတူ ဘီးလင်းမြို့နယ်ရှိ KNU တပ်မဟာ(၅)နယ်မြေတွင် စစ်သင်တန်းနှင့် ဖောက်ခွဲဖျက်ဆီးရေး သင်တန်းတက်ရောက်ခဲ့ကြောင်း၊ ထို့အပြင် စစ်သင်တန်းတက်ရောက် လိုသူ ၈ ဦးကိုလည်း ဘီးလင်းမြို့နယ်ရှိ KNU တပ်မဟာ(၅) နယ်မြေသို့ ပို့ဆောင် စေလွှတ်ပေးခဲ့ကြောင်း သိရှိရသည်။