ရမည်းသင်းမြို့၊ အောင်မင်္ဂလာရပ်ကွက်ရှိ မြန်မာ့ရှေ့ဆောင်ဘဏ်အား ဓါးပြတိုက်ရာတွင် ပါဝင်သည့် တရားခံများအား ဖမ်းဆီးရမိ
နေပြည်တော်၊ နိုဝင်ဘာလ ၂၇
၂၀၂၁ ခုနှစ်၊ နိုဝင်ဘာလ ၂၆ ရက် မွန်းလွဲ ၁ နာရီ ၂၅ မိနစ်တွင် မန္တလေးတိုင်း ဒေသကြီး၊ ရမည်းသင်းမြို့၊ အောင်မင်္ဂလာရပ်ကွက်ရှိ “မြန်မာ့ရှေ့ဆောင်”ဘဏ်၌ အမျိုးသား ၂ ဦးက ဘဏ်လုံခြုံရေးဝန်ထမ်းအား သေနတ်ဖြင့် ချိန်ရွယ်ကာ ဘဏ် အတွင်း ဝင်ရောက်၍ ငွေကျပ် သိန်း ၁၀၀၀ ကျော်အား ဓါးပြတိုက်မှုဖြစ်စဉ် ဖြစ်ပွား ခဲ့ကြောင်းနှင့် ပြစ်မှု ကျူးလွန်သူများကျန်ရှိခဲ့သည့် သေနတ်အတို ၁ လက် (ကော်သေနတ်)အား သိမ်းဆည်း ရရှိခဲ့ပြီး တရားခံများအား ဖော်ထုတ်ဖမ်းဆီးနိုင်ရေး လုံခြုံရေးတပ်ဖွဲ့ဝင်များက စုံစမ်း စစ်ဆေးဖော်ထုတ်လျက်ရှိကြောင်း နိုဝင်ဘာလ ၂၆ ရက်တွင် သတင်းထုတ်ပြန်ထား ရှိခဲ့ပြီးဖြစ်သည်။
ဓါးပြတိုက်မှုဖြစ်စဉ်နှင့် ပတ်သက်၍ တရားခံများအား ဖမ်းဆီးရမိရေး စုံစမ်း ဖော်ထုတ်မှုများပြုလုပ်ခဲ့ရာ နိုဝင်ဘာလ ၂၆ ရက် ညပိုင်းတွင် ပြစ်မှုကျူးလွန်ရာတွင် ပူးပေါင်းပါဝင်ကျူးလွန်ခဲ့သူများဖြစ်သည့် အဆိုပါဘဏ်မှ ဝန်ထမ်းများဖြစ်သော ရမည်းသင်းမြို့နေ လက်ထောက်ကြီးကြပ်ရေးမှူးများဖြစ်သည့် ကျော်ကျော်ဦး(၃၃)နှစ် နှင့် ဝေဖြိုးလှိုင်(၃၁)နှစ်၊ ဘဏ်ခွဲဒုမန်နေဂျာဖြစ်သူ သန်းဇော်ကို(၄၃)နှစ်တို့အား ဖမ်းဆီး ရမိခဲ့သည်။
