၁။ တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ ကြီးကြပ်ကွပ်ကဲမှုဖြင့် နေပြည်တော် ကောင်စီနယ်မြေ အပါအဝင် တိုင်းဒေသကြီး၊ ပြည်နယ်များတွင် တရားမဝင်ကုန်သွယ်မှုတိုက်ဖျက်ရေး အထူးအဖွဲ့များကို ဖွဲ့စည်း၍လည်းကောင်း၊ အကောက်ခွန်ဦးစီးဌာနက ဦးဆောင်သည့် One Stop Service ဌာနဆိုင်ရာအဖွဲ့များ ဖွဲ့စည်း၍လည်းကောင်း၊ နယ်စပ် ဝင်/ထွက်ဂိတ်များ၊ နယ်စပ်ကုန်သွယ်ရေးရုံးနှင့် စခန်းများ၊ အမြဲတမ်းစစ်ဆေးရေးစခန်းများ၊ ကုန်သွယ်မှု လမ်းကြောင်းတစ်လျှောက်နှင့် ကုန်ပစ္စည်း သိုလှောင်ရုံများ၊ အပြည်ပြည်ဆိုင်ရာဆိပ်ကမ်းများနှင့် လေဆိပ်များ၊ ကမ်းရိုးတန်းဆိပ်ကမ်းများတွင် တရားမဝင်ကုန်သွယ်မှုတိုက်ဖျက်ရေးလုပ်ငန်းများကို ထိရောက်စွာ ဆောင်ရွက်လျက်ရှိရာ သတင်း အချက်အလက် ရရှိမှုသည် အလွန်အရေးပါလျက်ရှိကြောင်း သိရှိရပါသည်။
၂။ တာဝန်သိပြည်သူများ၏ သတင်းပေးတိုင်ကြားမှုများကြောင့် ၂၀၂၄ ခုနှစ်၊ မေလအတွင်း သတင်းရရှိမှု (၇၉)ကြိမ် ရရှိခဲ့ပြီး၊ သတင်းမှား(၇)ကြိမ်၊ နောက်ကျသတင်း(၁)ကြိမ်နှင့် ဖမ်းဆီးရမိမှု (၇၁)ကြိမ် ဖြစ်ပါသည်။ ဖမ်းဆီးရမိမှု အမှုတွဲ(၁၀၇)မှု ဖွင့်လှစ်ထားပြီး ဖမ်းဆီးရမိမှုများတွင် သစ်မျိုးစုံ၊ လုပ်ငန်းသုံးပစ္စည်းများ၊ လူသုံးကုန်ပစ္စည်းများနှင့် စားသောက်ကုန်ပစ္စည်းများ ဖြစ်သော ကုန် ပစ္စည်း (၆၆)မျိုး အပါအဝင် ခန့်မှန်းတန်ဖိုးကျပ် (၄,၂၈၀.၅၄၄)သန်းနှင့် တရားမဝင် ကုန်စည် များ တင်ဆောင် လာသည့် မော်တော်ယာဉ်များ ဖမ်းဆီးရမိခဲ့ပါသည်။
၃။ ၂၀၂၄ ခုနှစ်၊ မေလအတွင်း သတင်းပေးတိုင်ကြားခဲ့သည့် တာဝန်သိပြည်သူများ ကိုလည်း ဖမ်းဆီးရမိမှု တန်ဖိုးကျပ် (၄,၂၈၀.၅၄၄)သန်း၏ ၂၀% ဖြစ်သော ကျပ်(၈၅၆.၁၀၉)သန်းကို သတင်းပေးဆုကြေးငွေအဖြစ် ချီးမြှင့်ပေးသွားမည်ဖြစ်ပါသည်။ ၂၀၂၃-၂၀၂၄ ဘဏ္ဍာနှစ်တွင် သတင်းပေးဆုကြေး အဖြစ် ကျပ်(၁၁၆၈.၄၈၈)သန်းအား ဆုကြေးငွေအဖြစ် ချီးမြှင့်ပေးခဲ့ပြီး ၂၀၂၄-၂၀၂၅ ဘဏ္ဍာနှစ်၊ မေလ အထိ သတင်းပေးဆုကြေးအဖြစ် ကျပ်(၃၈၀.၉၆၈)သန်းကိုလည်း ဌာနဆိုင်ရာ တာဝန်ရှိသူများမှ မြန်မြန်ဆန်ဆန်ချီးမြှင့်နိုင်ရေး ဆောင်ရွက်ပေးလျက်ရှိပါကြောင်းနှင့် သတင်းရရှိ မှုကြောင့် ဖမ်းဆီးရမိမှုများ နှင့်ပတ်သက်၍လည်း လစဉ်သတင်းထုတ်ပြန်ဆောင်ရွက်လျက် ရှိပါသည်။
၄။ ထို့ကြောင့် တာဝန်သိ ပြည်သူများအနေဖြင့် တရားမဝင်ကုန်သွယ်မှုသတင်းများနှင့်ပတ်သက်၍ လက်ကိုင်ဖုန်း - ၀၉၄၀၄၃၃၉၉၆၉၊ အော်တိုတယ်လီဖုန်းနံပါတ်-၀၆၇-၄၀၉၈၈၃ နဲ့ အီးမေးလ် antiillegaltradeinfo@gmail.com သို့ သတင်းပေးပို့တိုင်ကြားနိုင်ပါကြောင်း သတင်း ရရှိပါသည်။