နိုင်ငံတော်ကာကွယ်ရေးတာဝန်ထမ်းဆောင်စဉ် ထိခိုက်ဒဏ်ရာရရှိခဲ့ပြီး ဆေးရုံ၊ ဆေးခန်းများတွင် တက်ရောက်ကုသ၍ ပြန်လည်ကောင်းမွန်လာသည့် တပ်မတော်သား အရာရှိ၊ စစ်သည်များအား တပ်မတော်အကြီးအကဲ၏ လမ်းညွှန်မှု အရ အနားယူအပန်းဖြေခရီးစဉ်အဖြစ် ဧရာဝတီတိုင်းဒေသကြီး၊ ချောင်းသာ ကမ်းခြေသို့ မော်တော်ယာဉ်များဖြင့် နိုဝင်ဘာလ ၁၈ ရက်နေ့တွင် ပို့ဆောင် ပေးခဲ့သည်။
အဆိုပါ အပန်းဖြေခရီးသွားရောက်ခဲ့ကြသည့် တပ်မတော်သားအရာရှိ၊ စစ်သည်များသည် ချောင်းသာကမ်းခြေရှိချောင်းသာ အပန်းဖြေဧည့်ရိပ်သာမှ ယနေ့နံနက်ပိုင်းတွင် ပြန်လည်ထွက်ခွာကြရာ အနောက်တောင်တိုင်းစစ်ဌာနချုပ်မှ တာဝန်ရှိသူများ၊ ဌာနဆိုင်ရာဝန်ထမ်းများနှင့် ဒေသခံပြည်သူများက ရင်းရင်းနှီးနှီး ပို့ဆောင်နှုတ်ဆက်ကြပြီး ညနေပိုင်းတွင် ရန်ကုန်မြို့သို့ ပြန်လည်ရောက်ရှိကြရာ ရန်ကုန်တိုင်းစစ်ဌာနချုပ်မှ ဒုတိယတိုင်းမှူးနှင့် တာဝန်ရှိသူများက နွေးထွေးစွာ ကြိုဆိုခဲ့ကြသည်။
ထိုသို့ နိုဝင်ဘာလ ၁၈ ရက်မှ ယနေ့အထိ ၆ ရက်ကြာ အနားယူ အပန်းဖြေ ခရီး သွားရောက်ခဲ့ကြသည့် တပ်မတော်သားအရာရှိ၊ စစ်သည်များသည် ချောင်းသာ ကမ်းခြေ၌ လမ်းလျှောက်ခြင်း၊ ကိုယ်လက်ကျန်းမာရေး လေ့ကျင့်ခန်းများ ဆောင် ရွက်ခြင်း၊ သဲသောင်ပြင်၌ဘောလုံး၊ ဘော်လီဘောနှင့် ခြင်းလုံးအားကစားများ ဆောင်ရွက်ခြင်း၊ အနားယူအပန်းဖြေခြင်းများ ဆောင်ရွက်ခဲ့ကြသည်။
ထို့အတူ ပုသိမ်မြို့ရှိ ရွှေမုဌောစေတီတော်မြတ်ကြီး၊ ချောင်းသာကမ်းခြေရှိ ဆုတောင်းပြည့် ဇမ္ဗူပတိရုပ်ပွားတော်၊ ကျောက်မောင်နှမစေတီတော်၊ တဂေါင်း မင်္ဂလာမဟာစေတီတော်မြတ်ကြီး၊ ချောင်းသာမြို့၊ စကားဝါတောင်ပေါ်ရှိ ဒီပါ အေးမြမဟာနဂါးရုံဘုရားနှင့် အနန္တဇိနလောကမာရ်အောင် စေတီတော်မြတ်ကြီး တို့အား ဖူးမြော်ကြည်ညိုခြင်း၊ ချောင်းသာမြို့၊ စကားဝါတောင် မိုးကုတ်ဝိပဿနာ ရိပ်သာကျောင်းတိုက်ရှိ ကျောင်းထိုင်ဆရာတော် ဘဒ္ဒန္တ တေဇနိယထံ အလှူငွေများ ဆက်ကပ်လှူဒါန်းခြင်း၊ ဘုရားပုရဝုဏ်အတွင်း စုပေါင်းသန့်ရှင်းရေးများဆောင် ရွက်ခြင်း၊ ပုသိမ်မြို့ရှိ လောကနန္ဒာစေတီနှင့် နှီးဘုရားတို့အား ဖူးမြော်ကြည်ညိုခြင်း၊ ပုသိမ်မြို့ရှိ ရွှေစာပုသိမ်ထီးလုပ်ငန်းသို့ လေ့လာခြင်း၊ သဲဖြူကျွန်းသို့ လေ့လာခြင်း၊ ချောင်းသာမြို့၊ ရွှေသာယာမြို့မဈေး၊ သရက်တောထိုးမုန့် ပြုလုပ်ပုံ လေ့လာခြင်း၊ ကမာခရုလက်မှုပညာအားလေ့လာခြင်း၊ ရွှေသောင်ယံမြို့၊ Sea & Lake ရှိ ကျောက် စိမ်းပြတိုက်၊သစ်ပန်းပုပြတိုက်၊ ဒီရေတောတံတားတို့ကိုလေ့လာခြင်း၊ ပုသိမ်မြို့ရှိ ရွှေမြင်းပျံပုသိမ်ဟလဝါလုပ်ငန်းစသည့် အထင်ကရနေရာများသို့ သွားရောက် လေ့လာခြင်းများကို ဆောင်ရွက်ခဲ့ကြသည်။
အဆိုပါ အနားယူအပန်းဖြေခရီးစဉ်သွားရောက်ခဲ့သည့် အရာရှိ၊ စစ်သည်များ အား သက်ဆိုင်ရာ တိုင်းစစ်ဌာနချုပ်အလိုက် တိုင်းမှူးများ၊ တာဝန်ရှိသူများက လိုအပ်သည်များ ဖြည့်ဆည်းဆောင်ရွက်ပေးခြင်း၊ တန်ခိုးကြီးဘုရားစေတီများ၊ အထင်ကရနေရာများ၏ ဗဟုသုတဖြစ်ဖွယ်ရာ အကြောင်းအရာများနှင့် ပတ်သက် ၍ လိုက်လံရှင်းလင်းပြသခြင်းများကို ဆောင်ရွက်ပေးခဲ့ရာ အရာရှိ၊ စစ်သည်များ အနေဖြင့် စိတ်လက်ပေါ့ပါးစွာဖြင့် ဒေသန္တရဗဟုသုတများကို လေ့လာခဲ့ကြပြီး ၎င်းတို့အတွက် လွန်စွာအကျိုးရှိသည့် ခရီးစဉ်တစ်ခု ဖြစ်ကြောင်း၊ ယခုကဲ့သို့ အပန်းဖြေ ခရီးစဉ် သွားရောက်နိုင်ရေး စီစဉ်ဆောင်ရွက်ပေးခဲ့သည့် တပ်မတော် အကြီးအကဲများကိုလည်း ကျေးဇူးအထူးတင်ရှိကြောင်းနှင့် စိတ်ဓာတ်ခွန်အားများ ပိုမို ရရှိခဲ့ကြောင်း သတင်းရရှိသည်။