နေပြည်တော်၊ ဖေဖော်ဝါရီ - ၁၅
နိုင်ငံအတွင်းရှိ အချို့မြို့ကြီးများ၌ ဆူပူဆန္ဒပြမှုများဖြစ်ပေါ်လျက်ရှိပြီး နိုင်ငံတော် တည်ငြိမ်အေးချမ်းရေးနှင့် အများပြည်သူတို့၏လုံခြုံရေး၊ တရားဥပဒေစိုးမိုးရေးနှင့် ရပ်ရွာအေး ချမ်းသာယာရေးကို ထိခိုက်ပျက်ပြားစေသည့်အပြင် ရုန်းရင်းဆန်ခတ်မှုများ ဖြစ်ပွားစေနိုင် သည်ဟု ယုံကြည်ယူဆသဖြင့် ရာဇဝတ်ကျင့်ထုံး ဥပဒေပုဒ်မ-၁၄၄ ကိုထုတ်ပြန်၍ လူ ၅ ဦး သို့မဟုတ် ၅ ဦးထက်ပို၍ လူစုဝေးခြင်းမပြုရန် တားမြစ်ချက်များအား ထုတ်ပြန်ထားပြီး ဖြစ်သည်။
ထိုသို့ထုတ်ပြန်ထားရှိသော်လည်း ဆူပူဆန္ဒပြသူများအနေဖြင့် ရုန်းရင်းဆန်ခတ်ပြုမူခြင်း၊ ကြွေးကြော်သံများဖြင့်ကြွေးကြော်ခြင်း၊ လှုံ့ဆော်ဆန္ဒပြချီတက်ခြင်းများ စသည့် ဆူပူမှုများဖြစ် ပေါ်အောင် ဥပဒေမဲ့လုပ်ရပ်များအား ဆောင်ရွက်လျက်ရှိသဖြင့် သက်ဆိုင်ရာ မြို့နယ်များ အလိုက်လုံခြုံရေးတပ်ဖွဲ့ဝင်များနှင့် ဌာနဆိုင်ရာမှတာဝန်ရှိသူများက ရာဇဝတ်ကျင့်ထုံး ဥပဒေ ပုဒ်မ-၁၄၄ ကြေညာထားရှိကြောင်းနှင့်လူစုခွဲရန် လက်ကိုင်အသံချဲ့စက်များဖြင့် သတိပေးပြော ကြားခြင်းများ ဆောင်ရွက်လျက်ရှိသည်။
ထိုသို့ လုံခြုံရေးတပ်ဖွဲ့ဝင်များနှင့်တာဝန်ရှိသူများက ဆန္ဒပြသူများအား ဥပဒေမဲ့ လုပ်ရပ်များ မပြုလုပ်ရန်မေတ္တာရပ်ခံလျက်ရှိသော်လည်း ယနေ့နံနက်ပိုင်းတွင် နေပြည် တော်ကောင်စီနယ်မြေ၊ဇဗ္ဗူသီရိမြို့နယ်၊ မြို့မဈေးမီးပွိုင့်အနီး၌ မဝင်းသိင်္ဂီဌေး(ဘ)ဦးအေးငွေ ဦးစီးမှူး၊ လယ်ဝေးမြို့နယ်၊သမဝါယမဦးစီးဌာန ဦးဆောင်၍ အမျိုးသား ၁ ဦး၊ အမျိုးသမီး ၇ ဦး၊ စုစုပေါင်း ၈ ဦးသည်လည်းကောင်း၊ ဇဗ္ဗူသီရိမြို့နယ်၊ အဆင့်မြင့်ဈေးမီးပွိုင့်အနီး၌ သက်ပိုင်စိုး (ဘ)ဦးဝင်းလှိုင်စိုး၊ ရွှေကြာပင်ရပ်ကွက်နေသူ ဦးဆောင်၍ အမျိုးသား ၃၆ ဦးသည်လည်းကောင်း၊ ဥတ္တရသီရိမြို့နယ်၊ အမျိုးသားစီမံကိန်းနှင့်စီးပွားရေးဖွံ့ဖြိုးတိုးတက်မှုဝန်ကြီးဌာနရုံးရှေ့၌ ဦးခင်မောင်ဝင်း(ဘ)ဦးသိန်းဟန်၊ ကျည်တောင်ကန်ကျေးရွာနေသူ ဦးဆောင်၍ အမျိုးသား ၈ ဦး၊ အမျိုးသမီး ၁၂ ဦး၊ စုစုပေါင်း ၂၀ ဦးသည်လည်းကောင်း ဆန္ဒထုတ်ဖော်ခြင်းများ ပြုလုပ်ခဲ့သဖြင့် လုံခြုံရေးတပ်ဖွဲ့ဝင်များက လိုအပ်သည်များဆောင်ရွက်နိုင်ရေးအတွက် ဖမ်းဆီး ထိန်းသိမ်းခဲ့ပြီး
နေပြည်တော်အချုပ်ထောင်နှင့်ပုဗ္ဗသီရိမြို့နယ်ရှိ နယ်မြေခံရဲတပ်ရင်းသို့ ပို့ဆောင်ခဲ့ကာ လိုအပ်သလိုစစ်ဆေးမှုများဆောင်ရွက်ပြီး ၂၇ ဦးကို ပြန်လည်စေလွှတ်ခဲ့သည်။
ထိုသို့ဖမ်းဆီးထိန်းသိမ်းထားစဉ် နေ့လယ်ပိုင်းတွင် နေပြည်တော်အချုပ်ထောင်ရှေ့၌ အင်အား ၁၀၀၀ ဦးခန့်သည် ဖမ်းဆီးထားသူများ ပြန်လွှတ်ပေးရန်လာရောက် ဆန္ဒထုတ်ဖော် ခဲ့ကြောင်းနှင့်အဆိုပါဆူပူဆန္ဒပြမှုများဖြစ်ပွားခဲ့သည့် နေပြည်တော်ကောင်စီနယ်မြေ၊ ဇဗ္ဗူသီရိ မြို့နယ်နှင့် ဥတ္တရသီရိမြို့နယ်တို့သည် ရာဇဝတ်ကျင့်ထုံးဥပဒေပုဒ်မ-၁၄၄ ထုတ်ပြန်ထားသည့် မြို့နယ်များဖြစ်ပြီး အဆိုပါဖမ်းဆီးထိန်းသိမ်းထားသူများနှင့် ဆူပူလှုံ့ဆော်သူများအား လုပ်ထုံး လုပ်နည်းများနှင့်အညီ ဆက်လက်ဆောင်ရွက်လျက်ရှိသည်။
ထို့အတူ မန္တလေးတိုင်းဒေသကြီး၊ အောင်မြေသာစံမြို့နယ်၊ ၈၂x၂၆ လမ်းထောင့်ရှိ မြန်မာ့စီးပွားရေးဘဏ်၊ ဘဏ်ခွဲ(၁)ရှေ့တွင် ဆူပူဆန္ဒပြသူ ၂၀၀ ဦးခန့်က နိုင်ငံ့တာဝန် ထမ်းဆောင်လျက်ရှိသည့် ဘဏ်ဝန်ထမ်းများ ရုံးဆင်းချိန်တွင် တာဝန်ထမ်းဆောင်နေမှုနှင့် တည်ငြိမ်အေးချမ်းမှုပျက်ပြားစေရန် ရည်ရွယ်၍ ဆူပူနှောင့်ယှက်မှုများ ဆောင်ရွက်လျက်ရှိခြင်း ကြောင့် လုံခြုံရေးတပ်ဖွဲ့ဝင်များက သွားရောက်တားမြစ်ခဲ့ရာ ဆူပူဆန္ဒပြသူများက ကျောက်ခဲ များဖြင့် ပြန်လည်ပစ်ပေါက်ခဲ့သဖြင့် ဖမ်းဆီးထိန်းသိမ်းခဲ့ရာ အမျိုးသား ၁၀ ဦး၊ အမျိုးသမီး ၁၀ ဦး စုစုပေါင်း ၂၀ ဦးအား ဖမ်းဆီးထိန်းသိမ်းခဲ့သည်။
ထို့ပြင် မန္တလေးတိုင်းဒေသကြီးအတွင်း တည်ငြိမ်အေးချမ်းမှုရှိစေရေးအတွက် လုံခြုံရေး တပ်ဖွဲ့ဝင်များက ဆောင်ရွက်ပေးလျက်ရှိစဉ် ပြည်ကြီးတံခွန်မြို့နယ်၊ တံခွန်တိုင်အဝိုင်း အနီး၌ ဆူပူဆန္ဒပြလျက်ရှိသော အမျိုးသား ၉ ဦးကို ထပ်မံဖမ်းဆီးရမိခဲ့ကြောင်းနှင့် ဖမ်းဆီးရမိ သူများအား လုပ်ထုံးလုပ်နည်းနှင့်အညီ ဆက်လက်ဆောင်ရွက်နိုင်ရေး စီစဉ်ဆောင်ရွက်လျက် ရှိကြောင်း သတင်းရရှိသည်။