နေပြည်တော်၊ ဖေဖော်ဝါရီ - ၁၀
လက်ရှိအချိန်တွင် နိုင်ငံအတွင်းရှိ အချို့မြို့ကြီးများ၌ ဆူပူဆန္ဒပြမှုများ ဖြစ်ပေါ် လျက်ရှိပြီး နိုင်ငံတော်တည်ငြိမ်အေးချမ်းရေးနှင့် အများပြည်သူတို့၏ လုံခြုံရေး၊ တရား ဥပဒေစိုးမိုးရေး နှင့် ရပ်ရွာအေးချမ်းသာယာရေးကို ထိခိုက်ပျက်ပြားစေသည့်အပြင် ရုန်းရင်းဆန်ခတ်မှုများ ဖြစ်ပွား လာနိုင်သဖြင့် ရာဇဝတ်ကျင့်ထုံး ဥပဒေပုဒ်မ-၁၄၄ ကိုထုတ်ပြန်၍ လူ ၅ ဦး သို့မဟုတ် ၅ ဦးထက်ပို၍ လူစုဝေးခြင်းမပြုရန် တားမြစ်ချက်များ အား ထုတ်ပြန်ထားပြီး ဖြစ်သည်။
ထိုသို့ထုတ်ပြန်ထားရှိသော်လည်း နေပြည်တော် ကောင်စီနယ်မြေ၊ ဇမ္ဗူသီရိမြို့ နယ်၊ သပြေကုန်းအဝိုင်းအနီး၌ လူအင်အား ၁၅၀ ခန့်ပါဝင်သော ဆူပူဆန္ဒပြသူများသည် ဖေဖော်ဝါရီ ၉ ရက် နံနက်ပိုင်းမှစတင်၍ ကြွေးကြော်သံများကြွေးကြော်ခြင်း၊ လှုံ့ဆော် ဆန္ဒပြခြင်း၊ ရုန်းရင်းဆန်ခတ်ပြုမူခြင်းတို့ကို ဆောင်ရွက်လျက်ရှိကြောင်း သိရှိရသည်။
ယင်းသို့ လုပ်ဆောင်လျက်ရှိသဖြင့် မြန်မာနိုင်ငံရဲတပ်ဖွဲ့ဝင်များက လူစုခွဲရန် မေတ္တာရပ်ခံပြောဆိုခဲ့သော်လည်း လူစုခွဲခြင်းမရှိဘဲ ဆူပူဆန္ဒပြသူ ၁၀၀၀ ကျော်ခန့် အထိ စုဝေးလာခဲ့ကာ ကြွေးကြော်သံများကြွေးကြော်ခြင်း၊ လှုံ့ဆော် ဆန္ဒပြခြင်း၊ ရုန်းရင်းဆန် ခတ်ပြုမူခြင်းတို့ကို လုပ်ဆောင်လာခဲ့သောကြောင့် ခရိုင်အုပ်ချုပ်ရေးမှူးနှင့် မြို့နယ် အုပ်ချုပ်ရေးမှူးတို့က ရာဇဝတ်ကျင့်ထုံး ဥပဒေပုဒ်မ-၁၄၄ ကြေညာ ထားရှိကြောင်းနှင့် လူစုခွဲရန် လက်ကိုင်အသံချဲ့စက်များဖြင့် ထပ်မံသတိပေး ပြောကြားခဲ့သည်။
ရာဇဝတ်ကျင့်ထုံး ဥပဒေပုဒ်မ-၁၄၄ ကြေညာထားရှိသဖြင့် ဥပဒေကိုလေးစားလိုက် နာရန် အကြိမ်ကြိမ်ပြောကြားခဲ့သော်လည်း ဆူပူဆန္ဒပြသူများသည် မွန်းလွဲပိုင်းအထိ လူစုခွဲခြင်း မရှိသည့်အပြင် ပိုမိုအရှိန်မြင့်၍ ဆူပူမှုအသွင်ဖန်တီးလာသဖြင့် မြန်မာနိုင်ငံ ရဲတပ်ဖွဲ့ဝင်များက ဆူပူအကြမ်းဖက်မှုဖြိုခွဲရေး လုပ်ငန်းစဉ်များအတိုင်း ဥပဒေနှင့်အညီ ဆန္ဒပြလူအုပ်ကြီးအား လူစုခွဲနိုင်ရေး ဆောင်ရွက်ခဲ့ရာ ဆူပူဆန္ဒပြသူများက လေးခွများ၊ ကျောက်ခဲ၊ အုတ်ခဲများ၊ တုတ်များဖြင့် ပစ်ပေါက်ခြင်း၊ ပြင်းထန်စွာထိခိုက်ဒဏ်ရာ ရစေနိုင်သော ကုန်းသီး၊ သံမူလီ ခေါင်းတို့ဖြင့် ပစ်ခတ်ခြင်းများ စသည့်အကြမ်းဖက် လှုပ်ရှားမှုများ ပြန်လည် လုပ်ဆောင်ခဲ့ခြင်း၊ မွန်းလွဲ ၁၂ နာရီခွဲခန့်တွင် ဆူပူဆန္ဒပြသူများသည် ရဲတပ်ဖွဲ့ဝင်များအား ရန်လိုသည့် အပြုအမူများပါ ကျူးလွန်လာသဖြင့် မလွဲသာမရှောင် သာပဲ ပစ်ခတ်ထိန်းသိမ်းခဲ့ရာ ဆန္ဒပြသူ ၂ ဦး ဒဏ်ရာရ ရှိခဲ့ပြီး မွန်းလွဲ ၁ နာရီခွဲခန့်မှသာ လူစုကွဲခဲ့ကြောင်း သိရှိရ သည်။
ထိုသို့ ဆူပူဆန္ဒပြသူများအား ထိန်းသိမ်းစဉ် ၎င်းတို့၏အကြမ်းဖက် လုပ်ဆောင်မှု များကြောင့် မြန်မာနိုင်ငံရဲတပ်ဖွဲ့မှ တပ်ဖွဲ့ဝင် ၂၈ ဦး ထိခိုက်ဒဏ်ရာအသီးသီးရရှိခဲ့ပြီး ရဲအသုံး အဆောင်ပစ္စည်းများ ထိခိုက်ပျက်စီးခဲ့ကြောင်းနှင့် ဆန္ဒပြသူ ၂ ဦး ဒဏ်ရာရရှိ ခဲ့ကြောင်း သတင်းရရှိသည်။