ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင် ဗီယက်နမ် အမျိုးသား လွှတ်တော်ဥက္ကဋ္ဌ မစ္စတာချန်ထန်မန်းနှင့် တွေ့ဆုံဆွေးနွေး
နေပြည်တော် စက်တင်ဘာ ၅
ဗီယက်နမ်ဆိုရှယ်လစ်သမ္မတ နိုင်ငံသမ္မတ မစ္စတာတိုလန်းနှင့်ဇနီးတို့၏ ဖိတ်ကြားချက် အရ ဗီယက်နမ် ဆိုရှယ်လစ်သမ္မတနိုင်ငံ၌ ရောက်ရှိနေ သည့် ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင် ဗီယက်နမ်အမျိုးသားလွှတ်တော်ဥက္ကဋ္ဌ မစ္စတာချန်ထန်မန်းနှင့်ယနေ့နံနက်ပိုင်းတွင် ဗီယက်နမ်အမျိုးသားလွှတ်တော် အစည်းအဝေးခန်းမ၌တွေ့ဆုံဆွေးနွေးသည်။
ဦးစွာ ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင် အား အမျိုးသားလွှတ်တော်ဥက္ကဋ္ဌ မစ္စတာချန်ထန်မန်း နှင့်တာဝန်ရှိသူများက လှိုက်လှဲ နွေးထွေးစွာကြိုဆိုနှုတ်ဆက်ကြသည်။ ယင်းနောက် နိုင်ငံတော်သမ္မတနှင့်ဗီယက်နမ်အမျိုးသားလွှတ်တော်ဥက္ကဋ္ဌ မစ္စတာချန်ထန်မန်း တို့သည် မှတ်တမ်းတင်ဓာတ်ပုံရိုက်ကြသည်။
ထို့နောက် တွေ့ဆုံဆွေးနွေးပွဲကိုကျင်းပပြုလုပ်ရာ နိုင်ငံတော်သမ္မတနှင့်အတူ ခရီးစဉ် တွင်လိုက်ပါလာသည့် မြန်မာအဆင့်မြင့်ကိုယ်စားလှယ်အဖွဲ့ဝင်များ၊ ဗီယက်နမ်နိုင်ငံဆိုင်ရာ မြန်မာနိုင်ငံသံအမတ်ကြီးနှင့်တာဝန်ရှိသူများ တက်ရောက်ကြပြီး အမျိုးသားလွှတ်တော်ဥက္ကဋ္ဌနှင့် အတူလွှတ်တော်မှအဆင့်မြင့်အရာရှိကြီးများတက်ရောက်ကြသည်။ထိုသို့တွေ့ဆုံဆွေးနွေးရာတွင် အမျိုးသားလွှတ်တော်ဥက္ကဋ္ဌက ပြည်ထောင် စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင် ဦးဆောင်သည့် မြန်မာနိုင်ငံမှ အဆင့်မြင့်အရာရှိကြီးများအား လှိုက်လှဲ နွေးထွေးစွာ ကြိုဆိုပါကြောင်း၊ မြန်မာနိုင်ငံတွင် ပါတီစုံဒီမိုကရေစီအထွေထွေရွေး ကောက်ပွဲကို အောင်မြင်စွာကျင်းပနိုင်ခဲ့ပြီးအစိုးရသစ်တစ်ရပ်ဖွဲ့စည်းနိုင်ခဲ့ခြင်းတို့အတွက် ဂုဏ်ယူဝမ်းမြောက်မိပါကြောင်း၊ အဆွေတော်သမ္မတကြီး၏ ဦးဆောင်မှုအောက်တွင် နိုင်ငံ တည်ငြိမ်အေးချမ်းရေးနှင့် ပြည်သူတို့၏ လူမှုစီးပွားဘဝများ ဖွံ့ဖြိုးတိုးတက်ရေး၊ နိုင်ငံတကာ ဆက်ဆံရေးအပါအဝင်ကဏ္ဍစုံ၌ အပြုသဘောဆောင်သောရလဒ် ကောင်းများဖော်ဆောင် လာနိုင်မှုနှင့်အတူ နိုင်ငံတော်ဖွံ့ဖြိုးတိုးတက်အောင် ဘက်ပေါင်းစုံမှကြိုးပမ်းနေမှုများ အပေါ်များစွာဂုဏ်ယူပါကြောင်း၊ အဆွေတော်သမ္မတကြီး၏ ယခု ခရီးစဉ်သည် ဗီယက်နမ် နှင့်မြန်မာနိုင်ငံအကြားပူးပေါင်းဆောင်ရွက်မှုများကို ပိုမိုနက်ရှိုင်းစေရန် မောင်းနှင်အား အသစ် တစ်ရပ်ဖြစ်လာလိမ့်မည်ဟု ယုံကြည်ပါကြောင်း၊ ဗီယက်နမ်နိုင်ငံအနေဖြင့် မြန်မာနိုင်ငံ၏ အချုပ်အခြာအာဏာနှင့်နယ်မြေပိုင်ဆိုင်မှု၊ လွတ်လပ်စွာဆုံးဖြတ်ပိုင်ခွင့်များကို လေးစား တန်ဖိုးထားပါကြောင်း၊ အဆွေတော်အနေဖြင့် မိမိတို့ဗီယက်နမ်နိုင်ငံအပေါ်ယုံကြည်စိတ်ချရသည့် မိတ်ဆွေနိုင်ငံအဖြစ်မှတ်ယူဆောင် ရွက်နိုင်ပါကြောင်း၊ ဗီယက်နမ်-မြန်မာဘက်စုံပူးပေါင်း ဆောင်ရွက်မှု မိတ်ဖက်ဆက်ဆံရေးသည် ဆက်လက်ဖွံ့ဖြိုးတိုးတက်လာမည်ဖြစ်ကြောင်းနှင့် နှစ်နိုင်ငံပြည်သူများအတွက် လက်တွေ့ကျသောအကျိုးကျေးဇူးများကို ဆောင်ကြဉ်းပေးကာ ဒေသတွင်းငြိမ်းချမ်းရေး၊ တည်ငြိမ်ရေးနှင့်ပူးပေါင်းဆောင် ရွက်မှုများအတွက် အပြုသဘော ဆောင်သော ပံ့ပိုးကူညီမှုများပြုလုပ်နိုင်မည်ဟု ယုံကြည်ပါကြောင်း ဆွေးနွေးပြောကြားသည်။
ဆက်လက်၍ နိုင်ငံတော်သမ္မတကပြန်လည်ပြောကြားရာတွင် ယခုကဲ့သို့ ဗီယက်နမ်နိုင်ငံ၏ ဥပဒေပြုရေးတွင် အရေးပါသည့်မဏ္ဍိုင်တစ်ခုဖြစ်သော ဗီယက်နမ်နိုင်ငံ၊ အမျိုးသားလွှတ်တော်ဥက္ကဋ္ဌဖြစ်သူ အဆွေတော်နှင့် တွေ့ဆုံရသည့်အတွက် အထူးပင်ဝမ်း မြောက်မိပါကြောင်းနှင့် အဆွေတော်အနေဖြင့် အမျိုးသား လွှတ်တော်ဥက္ကဋ္ဌအဖြစ် ပြန်လည် ရွေးကောက်ခံရသည့်အတွက်လည်း ဂုဏ်ယူဝမ်းမြောက်ပါကြောင်း။
၂၀၂၆ ခုနှစ်၊ ဧပြီလတွင်ကျင်းပ ပြုလုပ်ခဲ့သည့် မိမိ၏ နိုင်ငံတော်သမ္မတအဖြစ် ကတိသစ္စာပြုခြင်းအခမ်းအနားသို့ ဗီယက်နမ်နိုင်ငံမှ ကိုယ်စားလှယ် စေလွှတ်တက်ရောက်ခဲ့သည့် အတွက်လည်း လှိုက်လှဲစွာကျေးဇူးတင်ရှိပါကြောင်း၊ ယခုတွေ့ဆုံဆွေးနွေးများမှကတစ်ဆင့် မိမိတို့နှစ်နိုင်ငံဥပဒေပြုရေးမဏ္ဍိုင်များဖြစ်သည့် လွှတ်တော်များအကြားချစ်ကြည်ရင်းနှီးမှု၊ အပြန်အလှန်နားလည်ယုံကြည်မှုနှင့်ပူးပေါင်းဆောင်ရွက်ရေးဆိုင်ရာကိစ္စရပ်များတိုးမြှင့်သွားနိုင်ရေး ရင်းနှီးပွင့်လင်းစွာ ဆွေးနွေးနိုင်လိမ့်မည်ဟုယုံကြည်ပါကြောင်း၊ မိမိတို့နှစ်နိုင်ငံအနေဖြင့် အစိုးရအချင်းချင်း၊ တပ်မတော်အချင်းချင်း၊ ပါတီအချင်းချင်းနှင့်ပြည်သူအချင်းချင်း ဆက်ဆံရေး သာမက ကဏ္ဍစုံပူးပေါင်းဆောင် ရွက်မှုများ ခိုင်မာအားကောင်းခဲ့ကြောင်း၊ ဗီယက်နမ်နိုင်ငံ အနေဖြင့် ကုလသမဂ္ဂအဖွဲ့ဝင် နိုင်ငံအားလုံးနှင့်သံတမန်ဆက်ဆံရေးထူထောင်ထား သည့်နိုင်ငံ ဖြစ်ပြီး ကုလသမဂ္ဂလုံခြုံရေးကောင်စီအမြဲတမ်းအဖွဲ့ဝင် ၅ နိုင်ငံလုံးနှင့် ဘက်စုံမဟာဗျူဟာ မြောက် မိတ်ဖက်ဆက်ဆံရေး ထူထောင်ထားနိုင်သည့်အတွက် ဝမ်းမြောက်ဂုဏ်ယူမိ ပါကြောင်း နှင့်နိုင်ငံတကာနှင့် အာဆီယံမျက်နှာစာတွင် ဗီယက်နမ်နိုင်ငံအနေဖြင့် မြန်မာနိုင်ငံဘက်မှ ရပ်တည် ထောက်ခံပေးမှုများအတွက် ကျေးဇူးတင်ရှိပါကြောင်း။
ဗီယက်နမ်-မြန်မာ အချင်းချင်းအပြန်အလှန်ထားရှိသည့် ယုံကြည်မှုနှင့်နှစ်နိုင်ငံ အဆင့်မြင့်အရာရှိကြီးများအကြားနီးကပ်သည့် ဆက်သွယ်မှုများကြောင့် နှစ်နိုင်ငံနှင့်တပ်မတော် နှစ်ရပ်အကြား ဆက်ဆံရေးနှင့်ပူးပေါင်းဆောင်ရွက်မှုကဏ္ဍများတွင်လည်း ပိုမိုတိုးတက်ခိုင်မာလျက်ရှိပါကြောင်း၊ မြန်မာ နိုင်ငံအနေဖြင့် ဗီယက်နမ်နှင့်လွှတ်တော်ချင်းဆက်ဆံရေးကို နှစ်နိုင်ငံ ဆက်ဆံရေး၏ အရေးကြီးသည့် နိုင်ငံရေးအခြေခံမဏ္ဍိုင်တစ်ခုဖြစ်သည်ဟုယုံကြည်ပြီး ပါတီ အချင်းချင်း၊ လွှတ်တော်အချင်းချင်းအကြား ပူးပေါင်းဆောင်ရွက်မှုများသည် နှစ်နိုင်ငံရှိရင်းစွဲ ဆက်ဆံရေးပိုမိုမြှင့်တင်ရာတွင် အထောက်အကူဖြစ်စေမည်ဖြစ်ကြောင်း၊ လွှတ်တော်ဥက္ကဋ္ဌ များအကြား အပြန်အလှန်ခရီးစဉ်များ အကောင်အထည်ဖော်ရေးကိုလည်း အားပေးလိုကြောင်း။
ယခုအခါ မြန်မာနိုင်ငံတွင် ပြည်သူလူထုက ရွေးချယ်တင်မြောက်သည့် အစိုးရသစ်ပေါ်ပေါက်လာပြီဖြစ်ပြီး လွှတ်တော်များလည်း ပြန်လည်စတင် နေပြီဖြစ်သည့်အတွက် ဗီယက်နမ်နိုင်ငံ၊ အမျိုးသားလွှတ်တော်၏ ဥပဒေပြုရေးနှင့်ကြီးကြပ်ရေးဆိုင်ရာ အတွေ့အကြုံ များကို မျှဝေပေးစေလိုကြောင်း၊လက်ရှိအချိန်တွင် မြန်မာနိုင်ငံအနေဖြင့် ဒီမိုကရေစီနိုင်ငံ တည်ဆောက်ရေးခရီးလမ်းခိုင်မာစေရေးအတွက် နိုင်ငံတော်နှင့်ကိုက်ညီသည့် ဒေသအခြေခံဖက် ဒရယ် စနစ်ကိုဖော်ဆောင်လျက်ရှိရာ ဗီယက်နမ်နိုင်ငံ၊ အမျိုးသားလွှတ်တော်အနေဖြင့် တတ်နိုင်သမျှပံ့ပိုးကူညီပေးစေလိုကြောင်း၊ ဒေသတွင်းနှင့်နိုင်ငံတကာ လွှတ်တော်ဆိုင်ရာမျက်နှာ စာများတွင် အပြန်အလှန်ပံ့ပိုးကူညီမှုများ ဆက်လက်ဆောင်ရွက်သွားနိုင်ရေးနှင့် အာဆီယံလွှတ် တော်များအကြားပူးပေါင်းဆောင် ရွက်မှုများကို ပိုမိုတိုးမြှင့်နိုင်ရေးတို့အတွက် လွှတ်တော်နှစ်ရပ် အကြား နီးကပ်စွာဆက်လက်ပူးပေါင်းဆောင်ရွက်သွားနိုင်မည်ဖြစ်ပါကြောင်း၊ မိမိတို့အစိုးရသစ် အနေဖြင့် မြန်မာနိုင်ငံတွင် ပါတီစုံဒီမိုကရေစီစနစ် ခိုင်မာအားကောင်းစေရေးနှင့်နိုင်ငံ တော်ဖွံ့ဖြိုးတိုးတက်စေရေးတို့အတွက် အပြုသဘောဆောင်သည့် ပြုပြင်ပြောင်းလဲမှုများကို လက်တွေ့ကျကျဖော်ဆောင်သွားမည်ဖြစ်ကြောင်း၊ အိမ်နီးချင်းနိုင်ငံများ၊ မိတ်ဖက်နိုင်ငံ များနှင့်ရှိရင်း စွဲချစ်ကြည်ရင်းနှီးမှုများကို ပိုမိုခိုင်မာစေကာ ဒေသတွင်းအကျိုးစီးပွားများကိုလည်း ဟန်ချက်ညီညီဆက်လက်ဖော်ဆောင်သွားမည်ဖြစ်ပါကြောင်းပြန်လည်ဆွေးနွေးပြောကြားသည်။
ယင်းနောက် နိုင်ငံတော်သမ္မတနှင့်ဗီယက်နမ်အမျိုးသားလွှတ်တော် ဥက္ကဋ္ဌတို့ သည် နှစ်နိုင်ငံပူးပေါင်းဆောင်ရွက်မှုမြှင့်တင်ရေးဆိုင်ရာ ကိစ္စရပ်များ၊ လွှတ်တော်အချင်းချင်းပူး ပေါင်းဆောင်ရွက်မှုမြှင့်တင်ဆောင်ရွက်သွားနိုင်မည့် ကိစ္စရပ်များနှင့်ပတ်သက်၍ ခင်မင်ရင်းနှီးစွာ အမြင်ချင်းဖလှယ်ဆွေးနွေးခဲ့ကြသည်။
ထို့နောက် နိုင်ငံတော်သမ္မတနှင့်ဗီယက်နမ်အမျိုးသားလွှတ်တော်ဥက္ကဋ္ဌတို့သည် အမှတ်တရမှတ်တမ်း တင်ဓာတ်ပုံရိုက်ကြကာ တက်ရောက်လာကြသူများအား ရင်းရင်းနှီးနှီး နှုတ်ဆက်ခဲ့ကြသည်။
ဆက်လက်၍ နိုင်ငံတော်သမ္မတသည် လွှတ်တော်အတွင်းလှည့်လည်ကြည့်ရှုပြီး ပြန်လည် ထွက်ခွာရာ ဗီယက်နမ်အမျိုးသားလွှတ်တော်ဥက္ကဋ္ဌက ရင်းနှီးနွေးထွေးစွာဖြင့် လိုက်ပါပို့ဆောင် နှုတ်ဆက်ခဲ့ကြောင်း သတင်းရရှိသည်။ မြဝတီ