ပါတီစုံဒီမိုကရေစီအထွေထွေရွေးကောက်ပွဲ အပိုင်း (၃)ကို မြို့နယ်ပေါင်း (၆၁)မြို့နယ်၌ ကျင်းပပြုလုပ်
နေပြည်တော်၊ ၂၀၂၆ ခုနှစ်၊ ဇန်နဝါရီ ၂၅
ပြည်ထောင်စုသမ္မတမြန်မာနိုင်ငံတော် ပါတီစုံဒီမိုကရေစီအထွေထွေရွေးကောက်ပွဲ အပိုင်း (၃) ကို ယနေ့ ၂၀၂၆ ခုနှစ် ဇန်နဝါရီ ၂၅ ရက် နံနက် ၆ နာရီမှစတင်၍ တိုင်းဒေသကြီးနှင့် ပြည်နယ်အသီးသီးရှိ မြို့နယ်ပေါင်း(၆၁)မြို့နယ်အတွင်း သတ်မှတ်မဲရုံအသီးသီး၌ ကျင်းပ ပြုလုပ်သည်။
မြန်မာနိုင်ငံ၏ အနာဂတ်တွင် ဖွံ့ဖြိုးတိုးတက်သောနိုင်ငံတော် တည်ဆောက်ရာ၌ အရေးပါဆုံးသော ပါတီစုံဒီမိုကရေစီအထွေထွေရွေးကောက်ပွဲအပိုင်း(၁)ကို ၂၀၂၅ ခုနှစ်၊ ဒီဇင်ဘာလ ၂၈ ရက်တွင် မြို့နယ် (၁၀၂) မြို့နယ်၌ လည်းကောင်း၊ ပါတီစုံဒီမိုကရေစီ အထွေထွေရွေးကောက်ပွဲအပိုင်း(၂)ကို ၂၀၂၆ ခုနှစ်၊ ဇန်နဝါရီလ ၁၁ ရက်တွင် မြို့နယ် (၁၀၀) မြို့နယ်၌ လည်းကောင်း နိုင်ငံတော်အစိုးရ၏ ဦးဆောင်မှု၊ ပြည်သူလူထု၏ လိုက်ပါဆောင်ရွက်မှုတို့ဖြင့် အောင်မြင်စွာ ကျင်းပပြုလုပ်နိုင်ခဲ့ပြီးဖြစ်ပြီး ယနေ့တွင် ပါတီစုံဒီမိုကရေစီအထွေထွေရွေးကောက်ပွဲအပိုင်း(၃)ကို ဆက်လက်ပြုလုပ်ရာ ကချင် ပြည်နယ်တွင် ဗန်းမော်မြို့နယ်၊ ဖားကန့်မြို့နယ်နှင့် ရွှေကူမြို့နယ်တို့၌ လည်းကောင်း၊ ကရင်ပြည်နယ်တွင် ကော့ကရိတ်မြို့နယ်နှင့် ကြာအင်းဆိပ်ကြီးမြို့နယ်တို့၌ လည်း ကောင်း၊ စစ်ကိုင်းတိုင်းဒေသကြီးတွင် ကနီမြို့နယ်နှင့် ဆားလင်းကြီးမြို့နယ်တို့၌ လည်းကောင်း၊ တနင်္သာရီတိုင်းဒေသကြီးတွင် လောင်းလုံးမြို့နယ်၊ သရက်ချောင်း မြို့နယ်နှင့် ပုလောမြို့နယ်တို့၌ လည်းကောင်း၊ ပဲခူးတိုင်းဒေသကြီးတွင် ကျောက်ကြီး မြို့နယ်၊ ကျောက်တံခါးမြို့နယ်၊ ဖြူးမြို့နယ်၊ အုတ်တွင်းမြို့နယ်၊ သဲကုန်းမြို့နယ်၊ ဝေါမြို့နယ်၊ ကြို့ပင်ကောက်မြို့နယ်နှင့် အုတ်ဖိုမြို့နယ်တို့၌ လည်းကောင်း၊ မန္တလေးတိုင်း ဒေသကြီးတွင် မြစ်သားမြို့နယ်၊ ချမ်းမြသာစည်မြို့နယ်၊ မလှိုင်မြို့နယ်၊ တောင်သာ မြို့နယ်၊ မြင်းခြံမြို့နယ်၊ ငါန်းဇွန်မြို့နယ်၊ သပိတ်ကျင်းမြို့နယ်နှင့် ပုသိမ်ကြီး မြို့နယ်တို့၌ လည်းကောင်း၊ ရန်ကုန်တိုင်းဒေသကြီးတွင် ဒဂုံမြို့နယ်၊ လမ်းမတော်မြို့နယ်၊ ဆိပ်ကြီး/ ခနောင်တိုမြို့နယ်၊ ဒလမြို့နယ်၊ ဒဂုံမြို့သစ်(ဆိပ်ကမ်း)မြို့နယ်၊ ဒဂုံမြို့သစ်(အရှေ့ပိုင်း) မြို့နယ်၊ မင်္ဂလာတောင်ညွန့်မြို့နယ်၊ သာကေတမြို့နယ်၊ မြောက်ဥက္ကလာပမြို့နယ်၊ တာမွေမြို့နယ်၊ ရန်ကင်းမြို့နယ်၊ ကျောက်တန်းမြို့နယ်၊ ခရမ်းမြို့နယ်၊ သုံးခွမြို့နယ်၊ စမ်းချောင်းမြို့နယ်၊ လှိုင်သာယာ(အနောက်ပိုင်း)မြို့နယ် နှင့် လှိုင်သာယာ(အရှေ့ပိုင်း) မြို့နယ်တို့၌ လည်းကောင်း၊ ရှမ်းပြည်နယ်တွင် မက်မန်းမြို့နယ်၊ ပင်လောင်းမြို့နယ်၊ ညောင်ရွှေမြို့နယ်၊ ဖယ်ခုံမြို့နယ်၊ မိုးနဲမြို့နယ်၊ ကျေးသီး မြို့နယ်၊ မိုင်းရှူးမြို့နယ်၊ သီပေါမြို့နယ် နှင့် ကျောက်မဲမြို့နယ်တို့၌ လည်းကောင်း၊ ဧရာဝတီတိုင်းဒေသကြီးတွင် ရေကြည်မြို့နယ်၊ ငပုတောမြို့နယ်၊ ဒေးဒရဲမြို့နယ်၊ ညောင် တုန်းမြို့နယ်၊ ဓနုဖြူမြို့နယ်၊ အင်္ဂပူမြို့နယ်၊ မော်လမြိုင်ကျွန်းမြို့နယ်၊ ဇလွန်မြို့နယ်နှင့် လေးမျက်နှာမြို့နယ်တို့၌ လည်းကောင်း ကျင်းပပြုလုပ်ကြပြီး အဆိုပါမြို့နယ်များရှိ သတ်မှတ်မဲရုံအသီးသီး၌ ဒေသခံ တိုင်းရင်းသား ပြည်သူများ က မြန်မာအီလက်ထရောနစ်မဲပေးစက် (Myanmar Electronic Voting Machine - MEVM) အသုံးပြု၍ ဆန္ဒမဲပေးခြင်းများကို ဆောင်ရွက်ကြသည်။
ထိုသို့ သက်ဆိုင်ရာပြည်နယ်နှင့် တိုင်းဒေသကြီးများရှိ ဒေသခံတိုင်းရင်းသား ပြည်သူများက သတ်မှတ်မဲရုံအသီးသီး၌ စနစ်တကျဆန္ဒမဲပေးခြင်းများ ဆောင်ရွက် လျက်ရှိသည့်အပြင် အဆိုပါ ပြည်နယ်နှင့် တိုင်းဒေသကြီးများအတွင်းရှိ တိုင်းစစ်ဌာနချုပ် များမှ တပ်မတော်သား အရာရှိ၊ စစ်သည်၊ မိသားစုများကလည်း သက်ဆိုင်ရာမဲရုံများသို့ သွားရောက်၍ စနစ်တကျ ဆန္ဒမဲပေးခြင်းများ ဆောင်ရွက်ကြ သည်။
ထိုသို့ ဆန္ဒမဲလာရောက်ပေးကြသည့် မဲဆန္ဒရှင်ပြည်သူများ လွတ်လပ်၊ အေးချမ်းစွာနှင့် အဆင်ပြေချောမွေ့စွာဆန္ဒမဲပေးနိုင်ရေးအတွက် လိုအပ်သည့် မော်တော်ယာဉ်များ၊ ကျန်းမာရေး ကဏ္ဍအတွက် ဆေးအဖွဲ့များနှင့် လုံခြုံရေးပိုင်းဆိုင်ရာများကို မဲရုံအသီးသီး၌ ကြိုတင်ပြင်ဆင် ထားရှိကြပြီး သက်ဆိုင်ရာတိုင်းဒေသကြီးနှင့် ပြည်နယ်အလိုက် ဝန်ကြီးချုပ်များနှင့် တာဝန်ရှိသူ များက လိုက်လံကြည့်ရှု၍ လိုအပ်သည်များ ပေါင်းစပ်ညှိနှိုင်း ဆောင်ရွက်ပေးကြသည်။
မဲပေးမှုပြီးဆုံးချိန်တွင် မဲရုံမှူးများနှင့် အဖွဲ့ဝင်များသည် နိုင်ငံရေးပါတီများမှ ကိုယ်စားလှယ်များ၊ နိုင်ငံတကာမှ ရွေးကောက်ပွဲစောင့်ကြည့်လေ့လာသူများ ရှေ့မှောက်၌ မဲပေးစက် (Control Unit) မှ ရလဒ်များကို ထုတ်ယူကာ စနစ်တကျ ရေတွက်ခြင်းနှင့် ကြိုတင်မဲ များကို စနစ်တကျ ရေတွက်ခြင်း လုပ်ငန်းများကို ဆောင်ရွက်ကြသည်။
ထို့သို့ ပါတီစုံဒီမိုကရေစီအထွေထွေရွေးကောက်ပွဲကြီး ကျင်းပမှုနဲ့ ပတ်သက်၍ မဲရုံအသီးသီးတွင် လာရောက်မဲပေးကြသည့်မဲဆန္ဒရှင်ပြည်သူများရဲ့ ရင်တွင်းစကားသံ များကိုလည်း ယခုကဲ့လို ကြားသိရပါသည်။
မဲပေးနေမှု အင်တာဗျူး(၂၅-၁-၂၀၂၆)
၁
ညီမပေးလိုက်တဲ့ မဲတစ်ပြားကြောင့် အကုန်လုံးပြောင်းလည်းသွားတာလည်း ဖြစ်စေချင် တာပေါ့နော်။ စီးပွားရေး ၊ ပညာရေး ၊ လူမူရေးအကုန်လုံး နိုင်ငံရေးဘာညာကအစပေါ့နော် အကုန်လုံးငြိမ်းချမ်းစေချင်တယ် လူမျိုးတွေအကုန်လုံး။ အစိုးရကိုတော့ တောင်းဆိုချင်တာတော့ အများကြီးပေါ့နော် ငြိမ်းချမ်းရေးနဲ့ပတ်သက်ပြီးတော့ တောင်းဆိုချင်တယ်။ ပညာရေးနဲ့ ပတ်သက် လို့လည်း တောင်းဆိုချင်တယ်။ ပညာရေးကိုလည်း ဒီထက်မက ပိုပြီးတော့ တိုးတတ်စေချင်တယ်။
၂
အရင်ကမဲပေးတာကြတော့ တံဆိပ်တုံးလေးတွေ နှိပ့်ရတာပေါ့နော်။ အခုကြတော့ စက်ကလေးနဲ့ ပိုပြီးတော့လွယ်ကူတာပေါ့။ အစိုးရသစ်တက်လာတယ်ဆိုရင်တော့ ပြည်သူတွေကို စီးပွားရေး၊ လူမူရေး အကုန်လုံး အစစအရာရာ အားလုံးအဆင်ပြေဖို့အတွက်ကို မျှော်လင့်ထား တာပေါ့။