တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) (၁၀)နှစ်ပြည့် နှစ်ပတ်လည်နေ့ အထိမ်းအမှတ် “ငြိမ်းချမ်းသော မြန်မာ့အနာဂတ်တည်ဆောက်ခြင်း” အလုပ်ရုံဆွေးနွေးပွဲကို ယနေ့ မွန်းလွဲပိုင်းတွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန(၁) ကျောက်စိမ်းခန်းမ၌ ကျင်းပသည်။
အဆိုပါ အလုပ်ရုံဆွေးနွေးပွဲသို့ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် အဖွဲ့ဝင်၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ ဥက္ကဋ္ဌ နယ်စပ် ရေးရာဝန်ကြီးဌာနနှင့် တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး၊ ဒုတိယ ဗိုလ်ချုပ် ကြီးရာပြည့်၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ အတွင်း ရေးမှူး ဒုတိယဗိုလ်ချုပ်ကြီး မင်းနိုင်နှင့် ညှိနှိုင်းရေးကော်မတီဝင်များ၊ တပ်မတော်အငြိမ်းစား အရာ ရှိကြီးများ၊ သံအမတ်ကြီးများနှင့် နိုင်ငံတကာမှဆွေးနွေးကြမည့် ပြည်ပ ပညာရှင်များ၊ လေ့လာသူများ၊ ပစ်ခတ် တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ (JMC) မှ ကိုယ်စားလှယ်များ၊ နိုင်ငံရေး ပါတီများမှကိုယ်စားလှယ်များ၊ NCA လက်မှတ်ရေးထိုးထားသည့် တိုင်းရင်းသား လက်နက် ကိုင် အဖွဲ့အစည်းများမှ ကိုယ်စားလှယ်များ၊ ငြိမ်းချမ်းရေးလုပ်ငန်းစဉ်တွင် ပါဝင်ဆောင်ရွက် သူများ၊ ပါဝင်သင့်ပါဝင်ထိုက်သူများ၊ အသိပညာရှင်၊ အတတ်ပညာရှင်များ၊ ပြည်ထောင်စုဝန်ကြီး ဌာနများနှင့် အဖွဲ့ အစည်းများမှ ညွှန်ကြားရေးမှူးချုပ်များ၊ တက္ကသိုလ်များမှ ပါမောက္ခများ၊ အစိုးရ မဟုတ်သော နိုင်ငံတကာအဖွဲ့အစည်းများ၊ အစိုးရမဟုတ်သော ပြည်တွင်းအဖွဲ့အစည်းများ၊ အသင်းအဖွဲ့ ကိုယ်စားလှယ်များ၊ မီဒီယာများနှင့် လေ့လာသူများ၊ စုစုပေါင်း ၃၅၁ ဦး တက်ရောက်ကြသည်။
အလုပ်ရုံဆွေးနွေးပွဲ ဖွင့်ပွဲအခမ်းအနားတွင် နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်အဖွဲ့ဝင်၊ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ ဥက္ကဋ္ဌ နယ်စပ်ရေးရာဝန်ကြီးဌာနနှင့် တိုင်းရင်းသားလူမျိုးများရေးရာဝန်ကြီးဌာန ပြည်ထောင်စု ဝန်ကြီး၊ ဒုတိယဗိုလ်ချုပ်ကြီး ရာပြည့် က အဖွင့်အမှာစကား ပြောကြားရာတွင် ယနေ့အလုပ်ရုံဆွေးနွေးပွဲသည် NCA ၏ ၁၀ နှစ်တာကာလအတွင်း အကောင်အထည်ဖော်နိုင်မှုများ၊ အောင်မြင်မှုများနှင့် သင်ခန်းစာ များကို ဆန်းစစ်သုံးသပ်နိုင်ရန်၊ အဓိကသက်ဆိုင်သူ Stakeholders များအကြား ငြိမ်းချမ်းရေး လုပ်ငန်းစဉ်မှရရှိခဲ့သည့့် အတွေ့အကြုံများနှင့် အမြင်များကိုမျှဝေနိုင်ရန်နှင့် မြန်မာနိုင်ငံအတွင်း ပေါင်းစည်း ညီညွတ်မှုကိုမြှင့်တင်ရန် ရည်ရွယ်ကျင်းပပြုလုပ်ခြင်းဖြစ်ကြောင်း၊ ရေရှည်တည်တံ့ ခိုင်မြဲသည့် ငြိမ်းချမ်းရေးတည်ဆောက်နိုင်ရန် တွေ့ဆုံဆွေးနွေးညှိနှိုင်းမှုများမှတစ်ဆင့် ရရှိလာ သည့် သဘောတူညီချက်များကို အကောင်အထည်ဖော်ဆောင်ရွက်ပေးခြင်းဖြင့် ယုံကြည်မှုကို တည်ဆောက် ရန်လိုကြောင်း၊ ငြိမ်းချမ်းရေးသည် နိုင်ငံဖွံ့ဖြိုးတိုးတက်မှုနှင့် လူမှုစီးပွားဘဝများ ဖွံ့ဖြိုးတိုးတက်ရေးအတွက် အခြေခံအကျဆုံးဖြစ်ကြောင်း၊ နိုင်ငံတည်ငြိမ်မှုမရှိပါက နိုင်ငံခြား ရင်းနှီးမြှုပ်နှံမှုများ ဝင်ရောက်လာရန် အဟန့်အတားဖြစ်စေနိုင်သည့် ဆိုးကျိုးများ တွေ့ကြုံရမည်ဖြစ် ကြောင်း၊ ထို့ကြောင့် နိုင်ငံကို တည်ငြိမ်မှုရှိအောင် တည်ဆောက်ရမည်ဖြစ်ကြောင်း၊ နိုင်ငံ တည် ငြိမ်အေးချမ်းရေးနှင့် ဖွံ့ဖြိုး တိုးတက်ရေးကိုထိခိုက်စေသည့် အကြမ်းဖက်လုပ်ရပ်များ ရပ်တန့် အောင် ဆောင်ရွက်သွားရန်လိုကြောင်း၊ ပြည်ထောင်စုရွေးကောက်ပွဲကော်မရှင်က လာမည့်ဒီဇင်ဘာ ၂၈ ရက်မှစပြီး ရွေးကောက်ပွဲကို အပိုင်းလိုက်ကျင်းပပြုလုပ်မည်ဖြစ်သည့်အတွက် ရွေးကောက်ပွဲဖြစ် မြောက်အောင်မြင်စေရေး အကြမ်းဖက်လုပ်ရပ်များ လျော့နည်းပပျောက်သွားအောင် ပြည်သူ အားလုံးက ပူးပေါင်းပါဝင်ကြိုးပမ်းပေးကြရန် အလေးအနက်ထား ပြောကြားလိုကြောင်း၊ တွေ့ကြုံရ မည့်အခက်အခဲစိန်ခေါ်မှုများ၊ ပဋိပက္ခများကို ဖြေရှင်းရာတွင် လူထုလိုအပ်ချက်နှင့် ပကတိနိုင်ငံ ရေးအခြေအနေအတိုင်း ပြောင်းလဲသင့်သည့် နည်းလမ်းများ၊ နည်းဗျူဟာများ၊ အကြံဉာဏ်ကောင်း များကို ယခုအလုပ်ရုံဆွေးနွေးပွဲမှ ဖော်ထုတ်ပေးကြရန် တိုက်တွန်းလိုကြောင်း ပြောကြားသည်။
ဆက်လက်၍ အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်း ရေးကော်မတီ အတွင်းရေးမှူး ဒုတိယဗိုလ်ချုပ်ကြီး မင်းနိုင်က နိုင်ငံတကာအလုပ်ရုံ ဆွေးနွေးပွဲ ကျင်းပရခြင်း၏ ရည်ရွယ်ချက်နှင့် အစီအစဉ်များအား ရှင်းလင်းပြောကြားသည်။
ယင်းနောက် “ဒေသတွင်းနှင့် ကမ္ဘာ့မိတ်ဖက်များ၏ အကူအညီဖြင့် မြန်မာ့ငြိမ်းချမ်းရေး တည်ဆောက်မှုကိုပံ့ပိုးနိုင်ရန် ပထဝီစီးပွားရေးဆိုင်ရာလမ်းကြောင်းများကိုရှာဖွေခြင်း” ခေါင်းစဉ်ဖြင့် ဆွေးနွေးရန် သဘာပတိက အဖွင့်အမှာစကားပြောကြားပြီး နိုင်ငံခြားဧည့်သည်တော်ပညာရှင်များ ဖြစ်သည့် အိန္ဒိယနိုင်ငံ၊ ထိုင်းနိုင်ငံ၊ အင်ဒိုနီးရှားနိုင်ငံတို့မှ ပညာရှင်များက “ဒေသတွင်းချိတ်ဆက်မှု၊ ကုန်သွယ်မှုနှင့် ငြိမ်းချမ်းရေးဖြစ်စဉ်”၊ “ပဋိပက္ခစီးပွားရေးနှင့် သမားရိုးကျမဟုတ်သော လုံခြုံရေး ခြိမ်းခြောက်မှုများ”၊ “ရွှေ့ပြောင်းအလုပ် လုပ်ကိုင်မှု၊ ပြည်သူ-ပြည်သူ အကြားဆက်ဆံရေး၊ ဘေးလွန်/ ပဋိပက္ခအလွန်ကာလ ပြန်လည်တည်ဆောက်ရေး” ခေါင်းစဉ်တို့ဖြင့် ဦးဆောင်ဆွေးနွေးကြပြီး တက်ရောက် လာကြသူများက အမြင်သဘောထားများဆွေးနွေးခြင်း၊ မေးခွန်းမေးမြန်းခြင်းများအပေါ် ဦးဆောင် ဆွေးနွေးသူများက ပြန်လည်ရှင်းလင်းဆွေးနွေးကြကာ အမျိုးသားစည်းလုံး ညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ ဥက္ကဋ္ဌ ဒုတိယဗိုလ်ချုပ်ကြီး ရာပြည့် က ဦးဆောင် ဆွေးနွေးကြသည့် နိုင်ငံခြားဧည့်သည်တော်ပညာရှင်များအား အမှတ်တရလက်ဆောင်ပစ္စည်းများ ပေးအပ်ကာ စုပေါင်းမှတ်တမ်းတင်ဓာတ်ပုံရိုက်ကြသည်။
အလုပ်ရုံဆွေးနွေးပွဲမှ ရရှိလာမည့်အပြုသဘောဆောင်သော အမြင်သဘောထားများ၊ အကြံပြုချက်များကိုသိရှိနားလည်ပြီး ငြိမ်းချမ်းရေး၊ နိုင်ငံ့စီးပွားဖွံ့ဖြိုးတိုးတက်ရေး၊ လုံခြုံရေးဆိုင်ရာ ကိစ္စရပ်များ၊ သဘာဝဘေးအန္တရာယ်ပြီးနောက် ပြန်လည်တည်ဆောက်ရေးတို့အတွက် ဆောင်ရွက် သင့်သည်များကို ဆက်လက်ကြိုးပမ်းအကောင်အထည်ဖော်ဆောင်ရွက်သွားမည် ဖြစ်ကြောင်းနှင့် ဆွေးနွေးပွဲအား အောက်တိုဘာ ၁၆ ရက်တွင် ဆက်လက်ကျင်းပသွားမည်ဖြစ်ကြောင်း သိရသည်။