မြန်မာနိုင်ငံအတွင်းသို့   နယ်စပ်လမ်းကြောင်းများမှတစ်ဆင့်    တရားမဝင် ဝင်ရောက်လာသည့်   ကင်ညာနိုင်ငံသား   ၇၇  ဦး သက်ဆိုင်ရာနိုင်ငံသို့   ထပ်မံပြည်နှင်လွှဲပြောင်းပေးအပ် နေပြည်တော်၊ ၂၀၂၅ ဧပြီ ၄ ရက်

နိုင်ငံတော်အစိုးရအနေဖြင့် အွန်လိုင်းလိမ်လည်မှု (Telecom Fraud)နှင့် ဒုစရိုက် မှုလုပ်ငန်းများကို အိမ်နီးချင်းနိုင်ငံများအပါအဝင် နိုင်ငံတကာမှ အဖွဲ့အစည်းများနှင့် ပူးပေါင်း၍ ပြတ်ပြတ်သားသား စုံစမ်းဖော်ထုတ် တိုက်ဖျက်လျက်ရှိပြီး အဆိုပါ လုပ်ငန်း များတွင်  ဆက်စပ်ပါဝင်ခဲ့ကြသည့်   ပြည်ပနိုင်ငံသားများကို သက်ဆိုင်ရာနိုင်ငံများသို့ စနစ်တကျ လွှဲပြောင်းပေးအပ်လျက်ရှိရာ  ကရင်ပြည်နယ်၊  မြဝတီမြို့ - မင်းလက်ပံ နယ်မြေတွင်   အွန်လိုင်း လောင်းကစားမှုများ၊   အွန်လိုင်းလိမ်လည်မှုများ    အပါအဝင် ဒုစရိုက်မှုများ ကျူးလွန်ခဲ့ကြသည့် ကင်ညာနိုင်ငံသား ၇၇ ဦးတို့အား ယနေ့တွင် မြန်မာ - ထိုင်း အမှတ်(၂) ချစ်ကြည်ရေး တံတားမှတစ်ဆင့် သက်ဆိုင်ရာနိုင်ငံသို့  လူသားချင်း  စာနာထောက်ထားမှုနှင့် နိုင်ငံအချင်းချင်း  ချစ်ကြည်ရင်းနှီးမှုတို့ကို   ရှေးရှု၍   ဥပဒေ လုပ်ထုံးလုပ်နည်းများနှင့်အညီ  ထပ်မံပြည်နှင်လွှဲပြောင်းပေးသည်။

ဦးစွာ  ကရင်ပြည်နယ်   လူမှုရေးရာဝန်ကြီး  ဦးစောထွန်းအောင်နှင့်    တာဝန်ရှိသူ များသည် အဆိုပါလွှဲပြောင်းပေးအပ်မည့်  ပြည်ပနိုင်ငံသားများကို  သက်ဆိုင်ရာနိုင်ငံသို့ အဆင်ပြေချောမွေ့စွာ ပြန်လည်ရောက်ရှိရေးအတွက် ဌာနဆိုင်ရာ    တာဝန်ရှိသူများက လိုအပ်သည့် အထောက်အထား  စာရင်းဇယားများ မှန်ကန်ပြည့်စုံစွာ  ဆောင်ရွက်နေမှု တို့ကို  လိုက်လံကြည့်ရှုစစ်ဆေးပြီး လိုအပ်သည်များ ဖြည့်စွက်မှာကြားသည်။

ထို့နောက် ပြည်နှင်လွှဲပြောင်းပေးအပ်ပွဲကို ကျင်းပရာ ကရင်ပြည်နယ် လူမှုရေးရာ ဝန်ကြီး ဦးစောထွန်းအောင်နှင့်  တာဝန်ရှိသူများ၊  ထိုင်းနိုင်ငံဆိုင်ရာ  ကင်ညာသမ္မတ နိုင်ငံသံရုံးမှ  Deputy  Head  of  Mission   Mrs.  Nancy  Deboar  Wanjiru  Mwangi နှင့် တာဝန်ရှိသူများ၊  ထိုင်းနိုင်ငံ တာ့ခ်ခရိုင်  လူဝင်မှုကြီးကြပ်ရေးဦးစီးဌာနမှ   တာဝန်ရှိသူများ  တက်ရောက်ခဲ့ကြပြီး မြန်မာနိုင်ငံမှ တာဝန်ရှိသူများက  သက်ဆိုင်ရာ နိုင်ငံမှ တာဝန်ရှိသူထံသို့  ပြည်နှင်လွှဲပြောင်း လက်ခံရေးဆိုင်ရာ   အထောက်အထား  စာရွက် စာတမ်းများကို စနစ်တကျ လွှဲပြောင်းပေးအပ်သည်။

၂၀၂၅ ခုနှစ်၊ ဇန်နဝါရီလ ၃၀ ရက်မှ ဧပြီလ  ၄ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်း  ၈၇၂၄ ဦးကို စစ်ဆေး ဖော်ထုတ်ထိန်းသိမ်းနိုင်ခဲ့ကာ ၎င်းတို့အနက်မှ ၇၁၄၂  ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ  စနစ်တကျ   လွှဲပြောင်း ပေးခဲ့ပြီး ကျန်ရှိသည့် ပြည်ပနိုင်ငံသား ၁၅၈၂ ဦးကို သက်ဆိုင်ရာနိုင်ငံများသို့  လွှဲပြောင်းပေးရန်  အသင့်ဖြစ်နေပြီဖြစ်ကြောင်းနှင့်  ၎င်းတို့ကို ကောင်းမွန်စွာထိန်းသိမ်း စောင့်ရှောက်ထားရှိသည်။

နိုင်ငံတော်အနေဖြင့် Online   Scam   Center လုပ်ငန်းများတွင် ပါဝင်ပတ်သက် နေသူများနှင့် နောက်ကွယ်မှကြိုးကိုင်သော နိုင်ငံခြားသားများကို ဖော်ထုတ်ဖမ်းဆီးပြီး ထိထိရောက်ရောက် ပြင်းပြင်းထန်ထန်အရေးယူနိုင်ရေး ဆောင်ရွက်လျက်ရှိသည့်အပြင် အကြောင်းအမျိုးမျိုးကြောင့်  ဒုက္ခရောက်နေကြသော နိုင်ငံခြားသားများနှင့် လူကုန်ကူး ခံရသည့် နိုင်ငံခြားသားများကို သက်ဆိုင်ရာနိုင်ငံများသို့ အမြန်ဆုံး   ပြည်နှင်လွှဲပြောင်း ပေးနိုင်ရေးတက်ကြွစွာ ပူးပေါင်း  ဆောင်ရွက်လျက်ရှိကြောင်း  သတင်းရရှိသည်။